SERVICE TERMS · 最後更新：2026年7月18日

開工前講清楚，
合作先唔會估估吓。

以下係Madefront Studio標準網站項目嘅基本安排。每個項目最終以個別報價、Scope及雙方書面確認為準。

報價及工作範圍

所有項目會喺開工前以報價或書面訊息確認頁數、功能、交付內容、修改輪數、價錢同預計交期。網站展示價錢屬標準方案起價；如實際需要超出範圍，會先確認新增費用，唔會未經同意直接加價。

除非報價另有列明，標準項目建議以50%訂金確認檔期，餘下50%喺正式上線或交付完整網站前支付。訂金確認後先安排製作時間。第三方平台、域名、付費插件及其他外部成本一般由客戶帳戶直接持有及付款。

工作天不包括星期六、星期日及香港公眾假期。交期由訂金、核心文案、Logo、圖片、價錢、聯絡資料及必要帳戶權限齊備後下一個工作天起計。客戶延遲提供資料或確認、改變Scope、增加功能或第三方平台延誤，交期會相應順延。

每個方案包括嘅集中修改輪數以報價為準。一輪修改指客戶一次過提供整合意見；零散新增要求可能合併為同一輪。已確認內容後提出新頁面、新功能、大幅重寫或改變方向，會先提供追加時間及費用。客戶需要確認產品、價錢、牌照、聲明及其他商業資料準確。

訂金用於預留檔期及已開始工作，項目開始後一般不予退還。如客戶需要暫停，Madefront會按當時進度確認已完成工作及重新排期安排。如Madefront無法開始或繼續未完成部分，會按實際未提供服務考慮退回相應款項。個別安排以書面確認為準。

域名、正式託管帳戶及客戶提供嘅內容應由客戶持有。收到全部款項後，客戶可按報價列明方式使用已交付網站。Madefront保留通用工作方法、底層結構及可重用元件；訂製程式碼、設計檔案、字體、圖片及第三方素材權利會按報價或原有授權處理。未經客戶同意唔會公開未發布嘅商業資料。

標準方案包括正式上線後7個曆日程式錯誤修正，處理已確認功能與交付版本不一致嘅問題。新內容、新功能、客戶自行修改、第三方平台更新、外部服務中斷、帳戶或裝置問題並不屬免費錯誤修正；需要時會先報價。持續維護可另行安排。

Madefront會按確認範圍完成網站及合理測試，但唔保證指定Google排名、流量、銷售額或查詢數量。搜尋器、社交平台、付款、預約、託管及其他第三方服務嘅審批、政策、收費及運作不由Madefront控制。

未確定條款點套用？

可以先講項目需要，正式開始前會再確認Scope、價錢、交期同付款安排。